L1 - TV - FM - TXT - .NL

Ploumen nao Venlo

PvdA-veurzitter Lilianne Ploumen bringk ein veerdaags werkbezeuk aan Venlo. Ze wilt d'r achter kómme waat d'r speult in de samelaeving en meidinke euver oplossinge veur probleme in de stad. Um ein good beeld te kriège geit het mei met de pliessie, sprik het met inwoeëners, bezeuk het kóffieshops en geit nao de wedstrijd VVV-AJAX.

Ploumen haet Venlo oetgepik umdet d'r in november gemeinteraodsverkeezinge zien en umdet 't de gebaortestad van PVV-politicus Geert Wilders is.

Pliessie waarschuwt veur oplichter

In Mestreech is 'nne oplichter bezig dae minse op laeftièd op slinkse wiès geld wet aaf te troggele. Meistal geit hae nao minse haer die juus geld hebbe gepind. Hij vruuëg dan of ze twieë euro kinne wissele. Daonao 'help' hae zien slachoffers met 't zeuke nao kleingeld in eur portemonnee.

Achteraaf bliek dan det 't net gepinde geld pleite is.

Nieje veurzitter Parade Brunssum

De Parade in Brunssum krieg eine nieje veurzitter. Sjaak van Oppen volg met ingank van 1 oktoeëber Thei Offermans op. Ut World Festival Parade Brunssum wuurt um de veer jaor gehalde. Hónderde dansers en muzikante oèt alle deile van de waereld traeje dan op in Brunssum. Aafgeloupe jaor woort 't folklore-festival aafgeslaote met ein tekort van 350-doeëzend euro.

Van Oppen wilt de folklore, dans en verbroedering van 't festival behalde, maar nao 't tekort van 2008 mot d'r ouk waere gewerk aan ein gezónde financiële baojem.

Maarten geit Plat

Nieuwslezer Maarten Bonnemaijers is deze week hard aan het studeren om vrijdag een nieuwsbericht in het dialect te kunnen lezen. De lessen van Maarten zijn te beluisteren via de luidsprekertjes onder dit artikel

Li Jiao oètgeschakeld in dóbbel

Li Jiao haet zich beej 't EK pingponge neet weite te plaatse veur de kwartfinales van 't dóbbelspeultoernooi.
De taofeltennisster van TTV Heerlen verloor in Stuttgart same met eure Kroatische partner Tamara Boros in de twieëde ronde van ein Oeës-Europees stel. Ut woort 2-3 taege Fadejeva oèt Rusland en Paskauskiene oèt Litouwe.

Li Jiao haet zich waal geplaats veur de derde ronde in het inkelspel. Net as Li Jie, det ouk veur TTV Heerlen speult.

Litouwer gewond beej inbraak

Eine 34-jäörige man oèt Litouwen is op snippenäörtje betrap beej ein inbraak in Wiert. De man had donderdignach de roèt van eine winkel aan de Langstraot ingehouwd um binne te komme.

Dao woort hae effe later door de pliessie gevonde. Hae had eine snee in zien hand, waorschienlik door de glaasscherve. D'n inbraeker zit vas.

Verkeezinge Eijsden-Margraote in november 2010

In Eijsden en Margraote zien op 24 november 2010 gemeinteraodsverkeezinge. Allebei de gemeintes wille vanaaf 1 jannewari 2011 samegaon. De Twieëde en Ieërste Kamer motte dao waal nog greun leech veur gaeve. Det gebeurt zoee wie 't nao oet zuut begin volgend jaor.

Waeges de aankommende herindeiling hove inwoeëners van Eijsden en Margraote in maart neet nao de stumbus. Allebei de gemeinteraode blieve aan wies de fusie ein feit is. Door 't samengaon ontsteit ein gemeinte met 25.000 inwoeëners.

Rotterdammer gewónd bij óngelók

Eine 21-jäörige Rotterdammer is gewónd gerak beej ein verkiersóngelók in Mestreech. De man reej donderdigaovend met ziene motorscooter euver de Meerssenerwaeg wie hae umvaer woort gereeje door eine automobilis. Dae had de scooterriejer neet gezeen beej het aafslaon nao de Professor Scholstraot.

De pliessie bekièk of de scooter waal de leechter aan had staon.

REPORTAGE: Venrayse spreekwoorden en gezegdes

Verslaggever Marc Teunissen heeft in Venray een afspraak met Frits Linssen. Die verzamelt al heel zijn leven duizenden Venrayse spreekwoorden en gezegdes. Ze zijn nu gebundeld in een boek dat volgende week verschijnt.

REPORTAGE: Spoedcursus 'Mestreechs'

Verslaggever Kevin Goes gaat overstag: hij gaat dialect leren. In café 't Pruuske krijgt hij van Régis Wijnands en zijn vader een spoedcursus Maastrichts.

Als u ook net zo mooi Maastrichts wilt leren praten als onze verslaggever, kijk dan even op www.aonthartgeleege.nl

REPORTAGE: Remunjs plat

Het zal u niet zijn ontgaan. Het is dialectweek bij L1. Elke dag een reportage over zaken die met dialect te maken hebben.
In deze laatste aflevering gaat verslaggever Marc Teunissen naar Roermond. Hij heeft daar een afspraak met oud-streektaalfunctionaris Pierre Bakkes, zangeres Mieke Berden en Roermondenaar pur-sang John Wiermans-Genang.

REPORTAGE: Dialect in Heerlen

Het is dialectweek bij L1. En daarom elke dag een reportage over zaken die met het dialect te maken hebben. En we beginnen in Heerlen, niet direct een stad die bekend staat om zijn dialect, zou je zeggen. Maar in Heerlen zelf weten ze wel beter. Verslaggever Kevin Goes ging op zoek naar dat Heelesj plat.

REPORTAGE: dialect kent geen grenzen

Het dialect is verankerd met Limburg, het is een groot stuk cultuur. Waarbij de Maas niet de dialectgrens is. Ook in Belgisch Limburg wordt er natuurlijk dialect gesproken. Al zijn er grote verschillen met onze provincie. Dat merken ook de leden van dialect-vereniging Veldeke Belsj.

Ober betaalt um zien vrouw um te laote umbringe

Einen ober oèt 't Belgisch-Limburgse Bilzen is aangehalde umdet hae geprobeerd haet zien vrouw te laote umbringe. D'n ober zoel dreej manne 5.000 euro hebbe gegaeve um zien vrouw oèt de waeg te ruùme. Nao de moord op de vrouw zoele de dreej nog ens 25.000 euro van um kriège.

De vrouw sloog zondaagaovend alarm wie éin van de manne beej eur op de stoep stond. De pliessie greep daonao d'n ober en de manskaerels in de kraag. D'n ober, dae met zien vrouw in echscheiding leet, zit vas.

Amber Alert vanaaf noow mit foto

Minse die eine mobiele tillefoon hebbe met internet kinne vanaaf noow op eure gsm ouk ein foto bekièke van ein vermis of ontvoerd kind. Vurrig jaor november is begós met 't versteure van ein Amber Alert as ein kind ontvoerd of vermis is. Minse die zich hebbe aangemeld, kriège dan ein sms-je.

Det blièf zoeë, maar ónderaan 't berichje kump noow ouk ein verwièzing nao de nieje mobiele website. Ruùm 230.000 particuliere en organisasies zien aangeslaote op Amber Alert.

Boèterink Parkstad in Crisis- en Herstelwet

Ut kabinet zuut 't waal zitte um d'n aanleg van de Boèterink in de Parkstad op te neme in de Crisis- en Herstelwet. Det haet 't kabinet laote weite aan de Twieëde Kamer. De Crisis- en Herstelwet is bestump um de economie 'nne stimulans te gaeve. Det kin door 58 projekte ierder te laote beginne. Daobeej waere procedures ingekort. Ut CDA haet d'r gister op d'n ierste daag van de algemeine beschouwinge op aangedronge um 'nne gas projekte waoonder de Boèterink op de liès te zette.

Ut kabinet stump daomei in maar wilt det formeel regele beej de behandeling van de wet. Volges de ierdere planning mót de Boèterink in de Parkstad 2015 klaor zien.

Ruùmere aanvóllende starterslieëning in Venlo

Venlo wilt de doorstreuming op de woeëningmert verbaetere door 't verlieëne van ein heurvergunning. Ouk verruùmp Venlo de aanvóllende starterslieëning. Minse die eur alde woeëning nog neet verkoch hebbe en döbbele woeënlaste hebbe , kinne beej de gemeinte ein vergunning kriege veur 't verheure van 't laegstaonde pand. De woeëning kin uuterlik viëf jaor verheurd waere. Ouk de starterslieëning wuurt ruùmer.

Vanaaf 2007 guf Venlo die lieëning aan minse die net neet genóg hypotheek kinne opneme. Wies noow kós 30.000 euro gelieënd waere, det wuurt verhoeëg nao 46.000 euro.

Minse die ein starterslieëning kriege, hove de ierste dreej jaor gen aaflossing en rente euver 't bedraag te betale.

Gevel geramp biej Mediamert

Beej de Media Markt in Remund is vannach de gevel geramp. De daders reeje met einen auto iers door de veurroèt van de centrale hal en vervolges woort de rolpaort van de Media Markt oètein getrokke.

Oèt de winkel woort veural foto-apparatuur meigenaome. Wie groeët de schaaj is, is nog neet bekind.

Aantal werkloze blief gelièk

Ut aantal werkloze in Limburg is in augustus zoeè good as zeker gelièk gebleve met de maond dao veur. In augustus stónde 40.569 minse as werkzeukende zónder baan geregistreerd. Det ware d'r 132 mièr as in juli.

De greuj kump gehièl op 't conto van Noord- en Midde-Limburg. Dao woorte 188 nieje werkzeukende geregistreerd.
In Zuùd-Limburg daalde 't cièfer met 36. Vergeleke met ein jaor geleeje is 't aantal werkloze in Limburg met 16 procent toegenaome. De groeëtste greuj, 53 procent, is in Aarse en Velde.

Willy Dullens zeker nao VVV-Venlo

Fortuna-icoon Willy Dullens geit veur VVV-Venlo werke. De aafgeloupe waeke waas dao al spraoke van, maar noow is det zeker. Dullens zal zich met verschillende voetbaltechnische zake gaon bezighalde veur de Venlose club. Zoeë zal de ald-international zich ónder mièr richte op 't scoute van talente.

Met de euvergank van Dullens nao VVV kump ein ind aan de lange euvereinkóms tösse de Sittardenaer en Fortuna. Dullens vertrek beej Fortuna umdet hae en de club 't neet ins kóste waere euver ein niej rol binne de Sittardse club.

Gezondheidszörg bezuiniginge

Ut Atrium-gashoès in Heerle vindt det minse die zónder verwièsbreefke óf gooje raeje nao de ieërste hölp kómme, zelf de raekening mótte betale. Ut gashoès is 't op dit punt ins met minister Klink van Volksgezóndheid. Dae wilt op dees wiès 50 miljoen euro bespare.

De Nederlandse Vereniging van Ziekenhuizen is 't neet met de minister ins. De vereiniging haet d'r floep veur det d'r groeëte probleme ontstaon as patiënte waere geweigerd.

Schennispleger oet Wiert aangehalde

In Culemborg is eine 30-jäörige Wiertenaer aangehalde veur 't plege van schennis. Inkele kinder hadde gisteraovend eine man gezeen dae met ziene zwans oèt de bóks leep en eur lastig veel. De man woort effe later door pliessies gevónde in de schop van ein woeëning. Volges de pliessie zoog hae d'r behuurlik onverzórg oèt en had hae misschiens drugs gebroèk. De Wiertenaer zit vas op 't pliessiebureau van Tiel.

Goumans giftig op KNVB

MVV-veurzitter Joseph Goumans is giftig op de KNVB. Goumans verwièt de voetbalbond de euvereinkóms met d'n Törkse investeerder Bilgic in gevaor te bringe. De bond eis van MVV 't bewiès det Bilgic gen officiële betrekking haet beej ein boètelandse club. Det meug namelik neet volges de regels en de KNVB dreig noow eine streep te trekken door de plannen met d'n Törk. Maar volges Goumans leet de bewièslas juus beej de KNVB, en zoel de voetbalbond mótte aantoeëne det Bilgic verbónde is aan ein boètelandse club.

Man riejt in op beveiligingspersenièl

Eine bewaker van ein winkelbedrièf in Kerkraoj is aangereeje door einen automobilis. Ut 35-jäörige slachoffer rakde gewond aan de erm, schouwers en bein. De verdachte, eine 21-jäörige man oèt Landgraaf meldde zich later zelf op 't pliessiebureau. Hae is aangehalde. Ut gedeuns vond plaats op de parkierplaats van de zaak naeve 't Roda-stadion. De bewaker had d'n automobilis aangespraoke naodet hae troep oèt ziene auto had gegoeëid. Volges het slachoffer reej de bestuurder met opzet op um in.

Onderzeuk nao flaermuùs levert vaol informasie op

Ein ónderzeuk nao flaermuùs in Limburg haet ein schat aan informasie opgeleverd waomei de bièskes baeter kinne waere beschermp. Veur 't ónderzeuk woorte ruum 1200 flaermuùs gevange en van ein hiel klein zenderke veurzeen. Det leverde vuuël kinnis op euver de verblièfplaatse van de flaermuùs. Ein bepaold soort, de bosflaermoès, woort zelfs veur 't iers in 20 jaor weer in Limburg gezeen.

Baeter Venlo duit ouk neet mei

Baeter Venlo, de Venlose aafsplitsing van de PVV, duit tóch neet mei aan de gemeenteraodsverkeezinge. Ouk dees partie krièg neet genóg capabele minse beejein. De liès besteit oèt teleurgestelde minse die veur de partie van Wilders in de Venlose raod woele plaatsneme. Naodet Wilders had beslaote, waeges gebrek aan gooje kandidaten, neet mei te doon aan de Venlose verkeezinge, vormde zeej de aafsplitsing Baeter Venlo.

De partie ieverde onder mièr veur mièr veiligheid op straot en 't stopzette van subsidies veur groeëte kunsprojekte.

Mosaqua duit 't good bie de ANWB

Zwumbad Mosaqua in Gulpen kump erg good oèt de bus in ein veiligheidstes van de ANWB Kampioen. Ut blaad ónderzoch 't toezich in 25 Nederlandse zwumparadieze, wao ónder twieë in Limburg: Mosaqua en 't Heijderbos in Heijen.

Ut Gulpese bad is ein van de dreej positieve oètscheeters, met rapportcièfer 9. De toezichhalders lette good op, staon op eur pos en grièpe in as 't nuuëdig is, zaet de ANWB.

Ut Heijderbos krièg ein 7 in de tes. Heej wuurt 't toezich beoordeild as 'voldoende'.

Limburgse bedriève te weinig bezig met export

De meiste Limburgse bedriève zien ontevreeje euver eur export-meugelikhede. Maar det zien ze veural zelf schöld. Det zaet professor José Bloemer, die volgende waek wuurt aangesteld aan de Hogeschool Zuyd.

Volges Bloemer doon de Limburgse bedriève te weinig aan 't opbouwe van kontakte euver de grens. Ze loupe daodoor umzet mis.

De ondernemers die waal tièd staeke in boètelandse relasies make mièr umzet en mièr wins, zoeë blièk oèt 't onderzeuk van Bloemer.

Bewoeëners Beegden kontent

De meiste inwoeëners van Beegden zien kontent euver de wiès wao op de verkièrsveiligheid op de Hièrstraot is verbaeterd. Op dezen drökke doorgaonde waeg woort volges de bewoeëners vuuëls te hard gereeje. Raeje veur de pliessie en de gemeinte um ein speciaal projek te beginne, ónder mièr met intensieve snelheidscontroles.

Het projek is nao diek ein half jaor achter de rök. Ruum 60 procent van de bewoeëners zaet zich noow veilig te veule aan de Hièrstraot. Veur 't begin van 't projek waas det maar 14 procent.

Tot 180 oor werkstraf veur herrieschöppers

De pliessierechter in Remund haet taakstraffe wies 180 oor opgelag aan zeve manne die aafgeloupe kers eine 21-jäörige Ospelnaer hebbe mishandeld. Het slachoffer woort nao ein scheldpartie beej einen discotheek in Nederwiert door 't zevetal zoeëdoonde mishandeld, det hae in 't gashoès meus waere opgenaome.

De man dae 180 oor werkstraf opgelag haet gekrege, waas nao de mishandeling nog met zien volle gewich op 't op de grónd liggende slachoffer gesprónge. Behalve de taakstraf kriege dreej daders ouk nog eine cursus sociale vaardighede, en ein laefstieltraining.

Limburg mót scherpere keuzes make

Gouverneur Leon Frissen neump 't neet te verkómme det Limburg scherpere keuzes mót make in projekte waobeej ze steun vruuëg aan 't Rièk. Frissen zaet det as reaksie op van de miljoenennota. Daoin steit det 't kabinet de kómmende jaore duchtig mot bezuunige um de staotsschöld truuk te dringe.

Gouverneur Frissen vindt det Limburg veural mot inzette op de ontwikkeling van bedrieveterrein Avantis in Heerle en Greenport Venlo.
Ouk de chemische onderzeukscampus Chemelot in Gelaen en de life en science campus in Mestreech staon baovenaan 't lieske. Det geldt ouk veur maotregels die inspeule op 't keldere van 't aantal inwoeëners , alzoeë Frissen.

Veer aanhaldinge nao scheetpartie Zenith

Veer manne oèt 't Braobantse Gemert zien vannach aangehalde umdet zeej betrokke zoele zien beej de scheetpartie beej discotheek Zenith in Oëstrum, aafgeloupe zomer. In de nach van zaoterdaag 25 op zóndaag 26 juli woorte d'r ein paar kier geschaote op d'n discotheek. Nemes rakde daobeej gewond, waal woort 't gebouw gerak.

Nao 't incident is de Zenith einen tièd geslaote gewaes.

Remund krit poepzuuger

In Remund wuurt vanaaf maondaag poep gezaoge. Wethalder IJff nimp dan de poepzuùger in bedrief, dae door de gemeinte is ingeheurd um de euverlas van hondedrolle te vermindere.

De poepzuùger wuurt idderen daag van de waek in ein andere wièk ingezatte. De gemeinte betaalt ruum 32.000 euro veur de heur van 't mesjien, inclusief emes dae 't bedeent. Volgend jaor wuurt 't poep-proofprojek geëvalueerd, en gekeke of d'r tot aanschaf van eine zuùger wuurt euvergegaon.

NVU wilt meidoon aan gemeinteraodsverkeezinge

De Nederlandse Volksunie wilt volgend jaor op mierdere plaatse in Limburg meidoon aan de gemeinteraodsverkeezinge. Maar de extreemrechse partie wilt nag neet zegge in waat veur plaatse. Ierder deej de partie ouk al mei in Kerkraoj en Landgraaf, zonder succes euveriges. De NVU duit in idder geval neet mei aan de ierdere gemeinteraodsverkeezinge in Venlo, in november.

In die stad haet de Volksunie volgende waek zaoterdaag ein demonstrasie gepland. De NVU stap nao de rechter as de gemeinte Venlo gen toestumming guf.

Deal MVV-Bilgic veurluipig van de baan

De KNVB wilt veurluipig neet instumme met d'n deal tosse MVV en de investeerder Bilgic. Oet onderzeuk van de voetbalbond bliek dat d'n Törk ein functie haet beej de Törkse topclub Fenerbahce. Det is taege de reglemente van de KNVB. Als Bilgic dan toch nog wilt investere in MVV dan zal hae de functie in Turkije motte opgaeve, um zien belange oet mekaar te halde.

Bilgic wilt 750.000 euro investere in de Mestreechse club in ruul veur de helf van ein niej oet te gaeve aandeilepakket.

Visvièver LTM in Heerle behuurlik fiès

Ut geit neet good met de visvièver LTM in Heerle. De waterkwaliteit is slech en de vièver is behuurlik fiès. Det zaet 't waterschap Roer en Overmaas. Umwoeënende klage al langer euver d'n troep in en beej de vièver. D'r zien al einen houp visse doeëd, maar de gemeinte weigert in te griepe, alzoeë de buurtbewoeëners.

De gemeinte waas nog neet bereikbaar veur een reaksie.

Brandwaer veur oefening nao Weeze

D'n brandwaer Limburg-Noord oefent kómmend weekend wie ze een woeënwiek motte evacuere as dao ein gaaswolk is vreejgekomme, en wie de bewoeëners ontsmet motte waere. Daoveur wuurt gebroèk gemak van 't oefencentrum in 't Duitse Weeze, vlak euver de grens beej Bergen.

Aan de oefening doon zo'n 180 minse mei, met onder mièr 40 lotus-slachoffers. Um te helpe beej 't ontsmettingsgedeilte waere specialiste van 't ministerie van Binnenlandse Zake ingezatte.

Horstenaer ein paar kier euver de kop

In Venlo is 'nne 43-jäörige Horstenaer gewond gerak wie ziene wage euver de kop sloog op de A73. De man reej zunjigmorge euver de autosnelwaeg richting Venraoj. Volges de pliessie waas hae meugelik meug en rakde daodoor de vangrail en sloog eine gas kièr euver de kop.

De Horstenaer is nao 't gashoes gebrach. Ziene waage is gans kepot.

CDA-vraoge euver reanimasie op schoeël

Ut CDA in het Limburgs Parlement wilt weite wie 't steit met de verzeuke um middelbare schoeëlkinder in Limburg ein reanimasie-cursus te laote volge.

Het Limburgs Parlement haet d'r tot twieë kièr toe veur gepleit um te bekièke of ein deil van de verplichde maatschappelikke stage daoveur kin waere gebroek. Ut provinciebestuur zoel daoeuver kontak opneme met CDA-staotssikkertaris Marja van Bijsterveld.

Zunjig sprook CDA-minister Camiel Eurlings zich oèt veur ein reanimasie-cursus in 't lespakket. Hae deej det tiejes 'nne cursus in 't Academisch Gashoès Mestreech.

Meugelik dottercentrum in Venlo

As de Inspectie veur de Gezondheidszörg 't d'r mei ins is, meug 't VieCuri-gashoès in Venlo same met 't Laurentius-gashoès in Remund en het Academisch gashoès in Mestreech dotterbehandelinge gaon oètveure.

Minister Ab Klink van Volksgezondheid wilt het aantal gashuùzer det zelf dottert veurluipig neet oètbreide um de kwaliteit van 't dottere neet in gevaor te bringe. Allein kleine gashuùzer die ierder ein aanvraog indeende um te meuge dottere, kómme in aanmerking veur ein toestumming van de inspectie. Viecuri en Laurentius deeje det verzeuk veur twieë jaor truuk al.

Binnekort begint de opleiding van de cardiologe die de dotterbehandelinge gaon oètveure as de inspectie d'r mei akkoord geit. Nao verwachting start 't dottercentrum in Venlo in jannewari 2011.

NVU wilt demonstere in Venlo

De Nederlandse Volksunie wilt op zaoterdag 26 september een demonstrasie halde in Venlo. Met de demonstrasie wil de NVU aangaeve ut neet ins te zien met 't 'casino-kapitalisme', zoeë steit op de website van de partie. Heejmei wilt de NVU ónder mièr aandach vraoge veur gevolge van de economische crisis.

De extreem-rechse partie kees veur Venlo umdet Venlonaer Geert Wilders letsaan haet beslaote met zien PVV neet mei te doon aan de gemeinteraodsverkeezinge. Die zien in Venlo al in november umdet de gemeinte Aarse en Velde op 1 jannewari beej Venlo kump.

D66 eis pendelbuskes in Heije

Provincie, gemeinte Gennep en busverveurder Veolia mótte same de koste betalen om de kern Heije toch aopenbaar verveur te gaeve. Det vindt D66 in het Limburgs Parlement. De partie dink aan 't inzette van pendelbuskes.

Heijen is al haos twieë waeke verstaoke van aopenbaar verveur door ripperasies aan d'n enigste verbindingswaeg in het dórp. Daodoor kin d'r gen normale bus mier rieje. Dees situasie geit zeker wies jannewari deure en det kin neet, alzoeë D66.

Gewuuënlik geit 33 kièr per daag ein bus vanaaf de dreej bushaltes in Heije richting Venlo of op Numwaege aan.

Meiste 55-plussers veule zich gezónd

De meiste 55-plussers in Zuid-Limburg veule zich gezónd. Toch hebbe vuuël minse oèt dae groep gezóndheidsprobleme. Det blièk oèt ein enquête van de GGD's wao aan ruum 21.000 Limburgers alder as 55 jaor hebbe meigedaon.

De veurnaamste kwaole wao mei de groep te make haet, zien hert- en vaatziektes en diabetes. Ouk blièke 55-plussers las te hebbe van depressies en einzaamheid.

Ut waas veur 't ièrs det de GGD's ein onderzeuk uitveurde nao gezóndheid, laefstièl, welzien en zórg van zelfstandig woeënende 55-plussers. De gemeintes en de GGD's kinne met de ónderzeuksresultaten eur alderebeleid verbaetere.

Van der Hoeven bezeuk Océ

Minister Maria van der Hoeven van Economische Zake bringk vandaag ein bezeuk aan Océ in Venlo. Ze kump nao de printer- en kopieerfebriek um te praote euver de samenwerking tósse Océ en andere bedrieve um minse met kinnis te behalde.

Océ kreeg aan 't begin van dees maond geld van het Rièk um dees personieëlsleeje örges anders te detachere. Ut geit um werknemers die zich bezighalde met onderzeuk. Det is ein taak wao vuuël bedrieve in dees economisch slechte tieje op beknispele.

Verdachte drugsactie Mestreech vreej

De twelf verdachte van ein groeëte drugsactie zien allemaol weer op vreeje veut. De actie woort vrièdaag gehalde taege drugscriminaliteit in Mestreech. Zo'n hónderd pliessies vele vrièdaag ein kroeg en eine belwinkel aan de Scharnerwaeg binne. De twelf waere verdach van georganiseerde criminaliteit, witwasse en drugshandel.

De pliessie ging euver tot de inval nao ein raegen van klachte oet de buurt.

De pliessie stelt processen-verbaal op taege de twelf. Het Aopenbaar Ministerie besluùt dao nao euver meugelikke vervolging.